Bu gün boşanmadan sonra kredit borcunun kim tərəfindən ödəniləcəyi məsələsi cütlüklər arasında ən çox sual doğuran mövzulardan biridir. Xüsusilə nikah dövründə ər-arvaddan biri tərəfindən götürülmüş kreditin hüquqi məsuliyyəti bəzən qarışıqlıq yaradır. 

Məsələyə aydınlıq gətirmək üçün hüquqşünasın fikrini öyrəndik. Yenisabah.az-a danışan hüquqşünas Ramil Vəliyev bildirib ki, əmlak bölgüsü zamanı tərəflərin yalnız aktivləri deyil, borc öhdəlikləri də nəzərə alınmalıdır:

"Nikah dövründə ər və ya arvadın ailə ehtiyacları üçün götürdüyü kredit borcu onların ümumi əmlakına daxil olur və hər iki tərəf üçün hüquqi öhdəlik yaradır. pizza hut

Ər-arvadın bir-birinə qarşı əmlak bölgüsü haqqında iddiasına baxılarkən ümumi öhdəliklər üzrə borclar onların mülkiyyət payına mütənasib şəkildə bölünür. Hətta rəsmi nikah münasibətləri davam etsə də, ailə münasibətlərinə xitam verib-verməməsi, birgə təsərrüfatın aparılıb-aparılmaması və götürülmüş borcun ailə məqsədləri üçün istifadə olunub-olunmaması kimi halların araşdırılması vacibdir".

Hüquqşünas əlavə edib ki, ailə ehtiyacları üçün götürülməyən, yəni şəxsi məqsədlərlə çəkilmiş borcun icrasında da müəyyən hüquqi prosedurlar mövcuddur:

“Əgər kredit ailə ehtiyacları üçün götürülməyibsə və borclunun şəxsi əmlakı borcun ödənilməsinə kifayət etmirsə, kreditor ümumi əmlakın bölünməsi tələbi ilə məhkəməyə müraciət edə bilər. Bu halda, borcun icrası ümumi əmlakda borclunun payına yönəldilə bilər".

Ramil Vəliyev qeyd edib ki, ailə daxilində maliyyə məsələləri rəsmi nikahla yanaşı, real birgə yaşayış və ailə münasibətlərinin davam etdirilib-etdirilməməsi ilə də sıx əlaqəlidir.