Naxçıvandan Bakıya səfər etmək istəyən vətəndaşlar hər yay mövsümündə olduğu kimi, bu dəfə də ciddi çətinliklərlə üzləşiblər.

"Azərbaycan Hava Yolları"nın (AZAL) onlayn satış sistemində sentyabrın 16-dək bütün reyslər üzrə biletlərin satıldığı görünür. Həmçinin aviakasslarda da bilet satışı yalnız sentyabrın ortasından sonrakı tarixlərə satışa çıxarılır.

Qeyd edək ki, mövcud durum bölgədən paytaxta gəlmək istəyənlərin bütün planlarını alt-üst edib. Məlumdur ki, Naxçıvan Muxtar Respublikası ilə Azərbaycanın əsas ərazisi arasında yeganə rahat nəqliyyat vasitəsi uzun illərdir hava yoludur. Lakin tələbatın çox, reyslərin isə məhdud olması səbəbindən mütəmadi olaraq bilet problemi yaşanır. Bu isə xüsusilə tələbələr, xəstəlik və ya işlə bağlı təcili Bakıya gəlməli olan insanlar üçün ciddi narahatlıq yaradır. Naxçıvandan Bakıya və əks istiqamətə uçan təyyarə reyslərində yaranan sıxlıq xüsusən də yüzlərlə tələbələni çətin vəziyyətə salıb. Onlar bilet tapa bilmədikləri üçün seçdikləri ali məktəblərdə təhsillərinə vaxtında başlaya bilməyəcəklər.

Qeyd edək ki, AZAL hazırda Bakı-Naxçıvan və əks istiqamətdə gündəlik 8 reys həyata keçirir. Buna baxmayaraq, tələbatın çox olması səbəbindən reyslərin sayı kifayət etmədiyi, əlavə çarter reyslərə ehtiyac olduğu görünür.