Türkiyədə 4 gün sonra meşədə sağ tapılan və xəstəxanada vəfat edən memar Ece Gürelin ölümü ilə bağlı yeni detallar üzə çıxıb.

“Milliyet” xəbər verir ki, Eceyə Hale Nur Özen adlı qadın tərəfindən “cadu dərsləri” verildiyi məlum olub.

Belə ki, Özen sosial media hesabında verdiyi açıqlamada Ece Gürelin təxminən 2 il əvvəl ondan təlim aldığını açıqlayıb. Bu istiqamətdə hərəkətə keçən polislər Hale Nur Özeni saxlayıb.

Həmçinin Hale Nur adlı qadının astrologiya, rituallar və bədən dili başlıqları altında “Witchcraft dərsi” (“Cadu dərsləri”) adlanan təlim keçdiyi müəyyən olunub.

Xatırladaq ki, Ece Gürel martın 2-si evindən Belqrad meşəsinə gəzməyə gedəcəyini deyərək çıxıb və itkin düşmüşdü. Yaxınlarının məlumatından sonra axtarış-xilasetmə qrupunun iştirakı ilə meşədə genişmiqyaslı axtarış əməliyyatı başlamışdı. Xilasetmə qruplarının 4 günlük axtarışlarından sonra o, martın 6-sı sıldırım meşəlik ərazidə sağ tapılmışdı. Lakin 36 yaşlı Gürel xəstəxanada həyatını itirib.