Azərbaycan Rusiyadan beşinci nəsil Su-57 qırıcılarını almağa maraq göstərir.Virtualaz.org xəbər verir ki, bu barədə Rusiyanın müdafiə sənayesi şirkətlərindən birinin iki top-meneceri “Vedemosti”yə bildirib.
Mənbələr deyiblər ki, Su-57 qırıcılarının Azərbaycana satılmasına dair danışıqlar prosesinə yüksək siyasi səviyyədə yaşıl işıq yandırılıb. Bildirilir ki, oktyabrın 3-də Soçidə prezidentlər Vladimir Putin və İlham Əliyev arasında baş tutmuş danışıqlarda iki ölkə arasında hərbi-texniki əməkdaşlıq məsələləri də müzakirə olunub. Bu məlumatı Kreml administrasiyasına yaxın mənbə də təsdiq edib.
“Vedemosti” qeyd edir ki, həmin vaxt “Valday” forumunda çıxış edən prezident Əliyev təfərrüatlara varmadan hərbi-texniki əməkdaşlığın genişləndiriləcəyini deyib. Dekabrın 3-də isə Azərbaycanın xarici işlər naziri Elmar Məmmədyarov rusiyalı həmkarı Sergey Lavrovla danışıqların yekunu olaraq “Kommersant”a müsahibəsində deyib ki, Rusiya ilə silahlara dair yeni sövdələşmələr mümkündür.

“Rosoboroneksport”un nümayəndəsi Azərbaycanla Su-57 qırıcılarına dair danışıqların aparılması xəbərini şərh etməkdən çəkinib.
“Vedemosti” qeyd edir ki, son onillikdə Azərbaycan Rusiyadan təxminən 5 milyard dollarlıq silah müqaviləsi bağlayıb. Prezident Əliyevin Soçidə bildirdiyinə görə, indiyədək 3 milyard dollarlıq silah artıq çatdırılıb.
“Bu silah sövdələşmələrinin aviasiya hissəsi ancaq Mi-17 və Mi-35 vertolyotları ilə məhdudlaşıb, hərçənd Azərbaycan özünün döyüş aviasiya parkının yenilənməsinə də ciddi ehtiyac duyur. Çünki döyüş aviasiyasının əsasını modernləşdirilmiş MiQ-29 sovet qırıcıları təşkil edir. Azərbaycan çoxdandır JF-17 Pakistan-Çin qırıcılarını almağa maraq göstərir və artıq Pakistandan MFI-395 Super Mushshak yüngül təlim-məşq təyyarələrini alıb”,-Rusiya nəşri xatırladır.

“Vedemosti” əlavə edir ki, Azərbaycan üçün Su-57 qırıcılarına maraq üçün dönüş nöqtəsi Ermənistanın Rsuiyadan 4 Su-30SM qırıcısı alması, daha 8 təyyarə almağa hazırlaşması olub. Azərbaycanla yanaşı Su-57 qırıcılarını almağa Türkiyə də maraq göstərir, amma Hərbi Texniki Əməkdaşlıq üzrə Federal xidmətinin direktoru Dmitri Şuqayev 2019-cu ilin noyabrında deyib ki, bu danışıqlara ancaq Rusiya ordusunun tələbatını ödəyəndən sonra başlamaq olar. Çünki Rusiya Müdafiə Nazirliyi 76 Su-57 qırıcısı sifariş verib və maşınlar 2029-cu ilə qədər təhvil verilməlidir.
“Silah İxracı” jurnalının baş redaktoru Andrey Frolov hesab edir ki, Azərbaycanla Su-57 qırıcılarına dair danışıqlar kifayət qədər uzun çəkə və Azərbaycan tərəfdən bəzi şərtlərlə müşaiyət oluna bilər. İlk növbədə maliyyələşmə mexanizmi barədə şərtlərlə.
Ekspert hesab edir ki, Azərbaycan ən uzağı bir eskadrilya Su-57 qırıcısı almaq istərdi. Bu təyyarələri almaq istəyi bir tərəfdən də Ermənistanın Su-30SM qırıcıları əldə etməsi ilə bağlı yaranıb.
“Hesab edirik ki, Azərbaycan daha üstün təyyarə almağı lazım bilir. Digər tərəfdən Azərbaycan HHQ keyfiyyət və və miqdarca kütləvi yenlənməyə ehtiyac duyur, ona görə də seçim təkcə Su-57 qırıcılarının xeyrinə deyil, eyni zamanda məsələn, qiyməti xeyli ucuz olan Çin-Pakistan qırıcılarının da xeyrinə edilə bilər”,-Frolov bildirib.


Paylaş: