Aparıcı Elgiz Əkbər İnstaqram səhifəsində xalq artisti Ramiz Novruz, əməkdar artistlər Coşqun Rəhimov, Rafael İsgəndərov və aktyor Elməddin Cəfərovun Azərbaycanın ən zəngin aktyorları olduğunu yazıb.
Kult.az adı çəkilən aktyorlardan Elgiz Əkbərin bu paylaşımına münasibət öyrənib.
Əməkdar artist Coşqun Rəhimov: “Daxili baxımdan çox varlıyam. Maddiyyata qalanda da, şükür Allaha, hər şey qaydasındadır. Daxilim zəngindirsə, deməli, dünyanın ən varlısı mənəm”.
Aktyor Elməddin Cəfərov: “Mənə elə gəlir ki, Elgiz bəy pul baxımından yox, xarakter baxımından varlı olmağı nəzərdə tutub. Daha doğrusu, mən onun sözlərinə belə yanaşdım. Ona görə də Elgiz bəyə təşəkkürümü bildirirəm. Mənim üçün zənginlik pulla, kağızla ölçülmür. İnsanın zənginliyi daxilindədir. Maddiyyat baxımından isə ortabab yaşayan insanam. Yəni ən varlı aktyor deyiləm. Ən böyük arzum budur ki, Elgizin paylaşımı real olsun”.
Əməkdar artist Rafael İsgəndərov: “Bəli, Elgiz bəy düz deyir. Mən Azərbaycanda aktyor istedadı olan ən zəngin aktyorlardanam. Maddi cəhətdən ən varlı olmağım isə onun şəxsi fikridir”.


Paylaş: