Tokioda təşkil olunan XXXII Yay Olimpiya Oyunlarının boks yarışında bürünc medal qazanan Azərbaycan yığmasının idmançısı Loren Alfonso Bakıya qayıdıb.

Boksçumuzu Heydər Əliyev Beynəlxalq Hava Limanında Azərbaycan Boks Federasiyasının əməkdaşları, idman ictimaiyyətinin nümayəndələri, idmançının yaxınları və bokssevərlər qarşılayıb. Onlar mükafatçımız üçün müxtəlif xoş şüarlar səsləndiriblər.

81 kq çəki dərəcəsində fəxri kürsüyə yüksələn Alfonso buna sevindiyini deyib. Onun sözlərinə görə, Avropa Oyunlarından sonra Yay Olimpiya Oyunlarında da medal qazanması xoş bir hissdir:

“Medal qazandığım üçün çox sevincliyəm. Tokioda məqsədim çempion olmaq idi. Yarışa da yaxşı başlamışdım. Olimpiadada debütdə dünya çempionatının ikincisi olan özbəkistanlı Dilşadbəy Ruzmetovla qarşılaşdım. Kifayət qədər çətin alınan döyüşdə qələbə qazandım. Ardınca türkiyəli Bayram Malkanı da məğlub etdim. Yarımfinalda kubalı Arlen Lopeslə üz-üzə gəldim. Olimpiya və dünya çempionu ilə görüş də mənim üçün yaxşı başlamışdı. Lakin bunu sonadək davam etdirə bilmədim.

Daha təcrübəli olan rəqib finala adladı. O, həlledici görüşdə mənim Avropa Oyunlarında məğlub etdiyim böyük britaniyalı Bencamin Vitakerə qalib gələrək növbəti dəfə Olimpiadanın qızıl medalçısı adına yiyələndi. Tokio-2020-də mükafatçılar sırasına düşdüyüm və Yaponiya paytaxtında Azərbaycan bayrağını dalğalandırdığım üçün qürurluyam. Bununla kifayətlənməyəcəyəm. Əsas hədəfim növbəti yarışlarda da uğurlu çıxış edib, daha çox titul qazanmaqdır. İnanıram ki, bunu bacaracağam”.

Millimizin baş məşqçisi Umberto Orta Dominqes isə boksçularımızın Olimpiadadakı çıxışından danışıb. Alfonsonun üçüncü olmasını onun əzmkarlığı ilə əlaqələndirən mütəxəssis digər boksçularımızın medalsız qalmasının səbəblərinin analiz ediləcəyini, səhvlərdən nəticə çıxarılacağını vurğulayıb.

Qeyd edək ki, kişi boksçulardan ibarət Azərbaycan millisi Tokio-2020 Yay Olimpiya Oyunlarına beş idmançı ilə yollanıb və yarışı bir bürünc medalla bitirib.


















Paylaş: