Külli miqdarda narkotik vasitəni ölkə ərazisinə keçirməyə cəhd göstərən şəxslər saxlanılıb.

Bu barədə Dövlət Sərhəd Xidməti məlumat yayıb.

Bildirilib ki, aprelin 18-də Dövlət Sərhəd Xidmətinin Sərhəd Qoşunları Komandanlığının "Horadiz" sərhəd dəstəsinin xidməti ərazisində sahibsiz halda 10-ER-545 dövlət qeydiyyat nişanlı VAZ-2106 markalı nəqliyyyat vasitəsi aşkar edilib.

Sərhəd zastavası dərhal "Silaha" komandası ilə qaldırılıb, xidməti ərazi qapadılıb, pilotsuz uçuş aparatı (PUA) vasitəsilə şübhəli şəxslərin axtarışına başlanılıb.

Keçirilmiş sərhəd axtarışı və əməliyyat tədbirləri nəticəsində əllərində bağlama ilə avtomobilə yaxınlaşan Ağdam rayon sakinləri - 1989-cu il təvəllüdlü Taleh Natiq oğlu Məmmədov və 1991-ci il təvəllüdlü Əhəd Natiq oğlu İsmayılov saxlanılıblar.

Bağlamaya baxış zamanı ümumi çəkisi beş kiloqram 800 qram narkotik vasitə olan marixuana götürülüb.

Faktla bağlı əməliyyat-istintaq tədbirləri davam etdirilir.