Moskvadakı “Crocus City Hall” ticarət mərkəzinin konsert zalında törədilən terror aktında şübhəli bilinən şəxslərin idarə etdiyi “Renault” markalı avtomobil gecə saatlarında Bryansk vilayətinin Karaçevski rayonunun Xatsun kəndi yaxınlığında aşkarlanıb.

Bu barədə məlumatı “Baza” teleqram kanalı açıqlayıb.

Bildirilir ki, avtomobildəkilər hüquq-mühafizə orqanları əməkdaşlarının dayanma ilə bağlı tələbinə əməl etməyərək qaçmağa cəhd ediblər. Təqib zamanı atəş açılıb və avtomobil aşıb.

Nəticədə terrorçu olduğu ehtimal edilən biri yerindəcə saxlanılıb, qalanları isə meşəyə qaçıb. Daha sonra ikinci şübhəli aşkar edilərək saxlanılıb.

“Renault” markalı avtomobildən PM tapançası, AKM avtomatı üçün maqazin və Tacikistan vətəndaşlarının pasportları aşkar edilib.

İlkin məlumatlara görə, saxlanılanlardan biri Düşənbədən olan 19 yaşlı Məhəmmədsobir Fayzovdur. O, xəstəxanaya aparılıb.