Sabah təyyarə böyüklüyündə bir asteroid Yer kürəsinin yanından keçəcək.

Bu barədə NASA məlumat yayıb.

Bildirilib ki, 2025 QV9 adlanan nəhəng asteroid Yerə doğru sürətlə yaxınlaşsa da, onun keçidi planet üçün heç bir təhlükə yaratmır.

Təxminən 33 metr enində olan və təyyarə böyüklüyündəki bu kosmik qayanın planetimizə ən yaxın keçidini edəcəyi gözlənilir. Sürəti saatda 16 min km-dən çox olan bu cisim Yerdən təqribən iki milyon kilometr məsafədə olacaq. Bu məsafə təhlükəsiz görünsə də, kosmos mütəxəssisləri tərəfindən astronomik baxımdan “nisbətən yaxın” hesab olunur.

Bir cismin təhlükəli hesab olunması üçün onun 7,4 milyon kilometrdən yaxın keçməsi və 85 metrdən geniş olması əsas götürülür. 2025 QV9 məsafə kriteriyasına uyğun gəlsə də, cəmi 33 metr enində olduğu üçün təhlükəli sayılmır.

Alimlər gələcəkdə mümkün orbit dəyişikliklərinə qarşı bu asteroidi yaxından izləməyə davam edirlər.