Rusiyada Şərqi Sibir Dairəsinin Arbitraj Məhkəməsinin hakimi yoxa çıxıb və ilkin məlumatlara görə, o intihar edib. Sonuncu dəfə hakimi Anqara çayı üzərindəki Qlazkovski körpüsündə görüblər.

Bu barədə "Baza" "Telegram" kanalı xəbər verir.

Məlumata görə, 37 yaşlı Nikolay Kurts sentyabrın 3-nə keçən gecə evdən çıxıb. Yarım saat sonra müşahidə kamerası onu İrkutskdakı Qlazkovski körpüsündə qeydə alıb.

"Baza"nın yerli hüquq-mühafizə orqanlarındakı mənbələrinə görə, Kurtsun ölümü "təsdiqlənib" və "cinayət xarakteri daşımır". Lakin hakimin cəsədi hələ də tapılmayıb.

Vəkili tanıyan həmkarlarının fikrincə, o, işlə bağlı olmayan şəxsi səbəblərdən belə bir addım atmağa qərar vermiş ola bilərdi.

Qeyd edək ki, Nikolay Kurts 2023-cü ilin noyabrında Şərqi Sibir Dairəsinin Arbitraj Məhkəməsinin hakimi vəzifəsinə təyin edilib. Əvvəllər o, bir neçə il İrkutsk vilayətinin Arbitraj Məhkəməsində işləyib.