Dövlət İmtahan Mərkəzinin (DİM) sədri Məleykə Abbaszadə “Azərbaycan dili üzrə sertifikasiya imtahanı”nın onlayn platformasının təqdimat mərasimində çıxışı zamanı Azərbaycan Yazıçılar Birliyinin üzvlərini, müəllimləri, elm adamlarını Azərbaycan dili üzrə imtahandan keçməyə çağırıb.

Azərbaycan Yazıçılar Birliyinin üzvü Seyran Səxavət Redaktor.az-a açıqlamasında DİM sədrinin imtahanla bağlı çağırışına cavab verib.

"Başqa ixtisas sahiblərini deyə bilmərəm, amma yazıçılarla bağlı onu deyə bilərəm ki, biz Azərbaycan dilindən imtahan verməyə hazırıq. Bircə xırda şərtim var, bizdən 1 saat əvvəlcə Məleykə xanım imla yazsın, əgər yaxşı yazırsa, səhvi yoxdursa, bütün yazıçılar Azərbaycan dilindən imtahan verməyə hazırdırlar. Mən xahiş edərəm, hamısı Azərbaycan dilindən imtahan verərlər. Şükür məsləhətinə, Milli Məclisdə bir nəfər çıxışında bildirmişdi ki, evdə xanım əgər yoldaşına çay verirsə, zəhmət çəkir, ona görə xanıma pul ödənməlidir. Başqa bir çox stajlı deputat demişdi ki, Azərbaycanda boşanmalar ona görə çoxdur ki, evlənənlər çoxdur. Belə çıxır ki, evlənməsinlər, boşanma da olmasın. Azərbaycan yazıçısına Azərbaycan dilindən imtahan vermək, şükür məsləhətlərinə, istəyirlərsə eləsinlər. Amma mənim şərtim var və bu tək Məleykə xanıma aid deyil, mənim seçəcəyim onlarla, yüzlərlə məmura da aiddir. Onlar imladan 3 alsınlar, mən bütün Azərbaycan yazıçılarından xahiş edirəm ki, gedin Azərbaycan dilindən imtahan verin", - deyə yazıçı bildirdi.