Vergilər nazirliyinin sabiq əməkdaşları hakim qarşısına çıxarılır. Onlar barəsində açılmış cinayət işi üzrə ibtidai istintaq başa çatıb.

Musavat.com xəbər verir ki, vergi nəzarəti idarəsinin əməkdaşları Azər Allahverdiyevin və Cahid Tahirovun cinayət işi üzrə ibtidai istintaq başa çatıb. İş araşdırılması üçün bakı Ağır Cinayətlər Məhkəməsinə göndərilib.

Məhkəmə prosesi yaxın günlərdə hakim Novruz Kərimovun sədrliyi ilə başlayacaq.

Baş Prokurorluğun və İqtisadiyyat Nazirliyinin məlumatına görə, Dövlət Vergi Xidmətinin Bakı şəhəri Kiçik Sahibkarlıqla İş Baş İdarəsinin Operativ vergi nəzarəti idarəsinin əməkdaşları Azər Allahverdiyevin və Cahid Tahirovun qabaqcadan əlbir olaraq vətəndaşa məxsus çörək sexinə gələrək cari il ərzində vergi yoxlamalarının keçirilməməsi müqabilində 6000 manat məbləğində pul tələb edib.

Hər iki vəzifəli şəxs rüşvət alarkən cinayət başında yaxalanıblar.

Onlara qarşı Cinayət Məcəlləsinin 311.3.3-cü (rüşvət alma; külli miqdarda törədilikdə) maddəsi ilə ittiham irəli sürülüb.


Paylaş: