Cənubi Sudanda səlahiyyətlilər ölkənin vitse-prezidenti Riek Maçarın həbsinə order verib.

Bu barədə “Reuters” agentliyi məlumat yayıb. Bildirilib ki, onun mühafizəçiləri zərərsizləşdirilib. 

Riek Maçarın hələlik məlum olmayan ittihamlarla həbsinə qərar verilib. Hazırda onun saxlanılması istiqamətində iş aparılır. Ölkədə bir neçə həftədir vitse-prezident Riek Maçarın da mənsub olduğu Nuer xalqına aid silahlı dəstələr hökumət qüvvələrinə qarşı döyüşür. Döyüşlərdə onlarla insan həlak olub. BMT-nin məlumatına görə, fevral ayından bəri ən azı 50 min nəfər qaçqın düşüb. Döyüşlər paytaxtdan 1300 kilometr uzaqda baş versə də, münaqişənin ölkənin digər bölgələrinə yayılmaq təhlükəsi var.