Bu ilin yanvar-aprel ayları ərzində qanunsuz reklamların yayımı ilə əlaqədar baxılmış müraciətlərin sayında 10 faizdən çox artım qeydə alınıb.

Antiinhisar və İstehlak Bazarına Nəzarət Dövlət Agentliyindən verilən məlumata görə, qanunsuz reklamların yayımı ilə bağlı 61 müraciətə baxılıb. Bu göstərici 2024-cü ilin eyni dövrü ilə müqayisədə 10%-dən çox artım deməkdir. Ötən ilin müvafiq dövründə isə bu rəqəm 55 olub.

Sahələr üzrə aparılmış təhlil nəticəsində məlum olub ki, müraciətlərin böyük hissəsi - 27-si xidmət sahəsini əhatə edir. Daha sonra ticarət (11 müraciət), qeyri-qida məhsulları (8 müraciət), ictimai iaşə (3 müraciət) və digər sahələr (9 müraciət) üzrə müraciətlər qeydə alınıb. Ən az müraciət isə hər biri üzrə 1 müraciət olmaqla dərman vasitələri və tibbi avadanlıqlar, qida və tütün məmulatları üzrə daxil olub.