"Milyarderimiz də belə getdi. Fərhad Əhmədovu deyirəm. Onu qiyabi tanıyıram; şəkildə, televizorda görmüşəm. Qarşıma çıxsa, Allah eləməsin, desəm: "Fərhad müəllim yeni kitabım nəşriyyatdadır, kömək edin, 1000 nüsxə çap etdirib, havayı paylayacam oxuculara", cavabında oturub ağlayacaq ki, əli aşağıdır, krizisdir. Amma 1 milyon dolları gətirib gör kimə və nə üçün verib?!"

Bunu jurnalist Bahəddin Həzi qeyd edib.

Bahəddin Həzi azərbaycanlı milyarderin bir milyon dolları Hacı Qalib Salahzadəyə verməsini sərt tənqid edib:

"Bəli, milyarder o pulu Şeyxin oliqarx qudası Hacı Qalib Salahzadəyə verib ki, camaatı Həcc ziyarətinə aparsın. Hacı da xəsislik eləməyib: milyonun üstündən 300 min dolları götürüb, bir xeyli adamı aparıb Həccə. Özü belə deyib. Ancaq qalan 700 min dollar hara gedib? Bu haqda məlumat verməyib.

Heç olmasa, o bir milyondan bir yoxsul tələbənin təhsilhaqqını verib?! Yox! Avropaya, ya da nə bilim, Amerikaya, Yaponiyaya - elmi konfransa gedəsi bir gənc alimin uçuş biletini alıb?! Yenə yox! Bir əlaçı məktəbliyə heç olmasa bircə ədəd tablet bağışlayıb?! Yox, yox! Bəlkə bir rəssamın sərgisinə əl atıb?! Haşa!"

"Qısası, elmə, ədəbiyyata mədəniyyətə, sənətə deyil, ətalətə, cəhalətə dəstək verib. Millətin gözünü açmağa yox, kor eləməyə həmişə pul tapılır.

Milyarderə bax da sən!

Bu cür arxaik təfəkkürlü adamların milyarder olması özü ən böyük ədalətsizlikdir. Onun düşüncəsində millətin lokomotivi Hacı Qalibdir. Şair demişkən: "Sahibi-zərdə kərəm yoxdur, kərəm əhlində zər"

Paraq Hannanın "Yeni orta əsrlər" əsərini bir daha xatırladım" - jurnalist fikirlərini tamamlayıb.