Keçmiş məcburi köçkünlərin seçici siyahısını tərtib edən məntəqə seçki komissiyasının üzvləri əməkhaqlarını ala bilməməsindən narazıdırlar.

Bu barədə müraciət edən üzvlərdən biri bildirib ki, yanvarda almalı olduqları əməkhaqqı mart ayı olmasına baxmayaraq verilməyib.

Üzv bildirib ki, hər il bu ödənişlər vaxtında verilirdi:

"Dairə seçki komissiyalarının hər birinin məntəqə seçki komissiyaları var. Həmin komissiyaların 6 üzvü olur. Bu üzvlər seçkilərdən əlavə hər il yanvar ayında seçici siyahılarının dəqiqləşdirilməsi ilə əlaqədar 20 gün işdən azad olunaraq seçki məntəqəsinə təhkim olunurlar. 20 gün ərzində kim rəhmətə gedib, kimin 18 yaşı tamam olub, kim hərbi xidmətdədir, kim köçüb başqa yerə gedib və s. bunlar dəqiqləşdirilir. Biz də keçmiş məcburi köçkünlərin siyahısını tərtib edirik.

Bu işdə işlədikdən sonra yenidən öz işimizə qayıdırıq, 20 gün üçün isə bizə Mərkəzi Seçki Komissiyası tərəfindən əməkhaqqı verilir. Hər il alırdıq, bu il isə ala bilmirik.

Bələdiyyə seçkisi keçirilən yerlərdə işləyənlər əməkhaqlarını aldılar. Təhkim olunduğumuz rayonlarda bələdiyyə seçkisi keçirilmədiyi üçün biz ancaq seçici siyahısını tərtib etdik. İşlədiyimiz 20 günün pulu isə hər il verilsə də, bu il verilməyib.

Seçki keçiriləndə onsuz da 2 aylıq ödəniş alırdıq. Seçki keçirilməyəndə isə yalnız 20 gün siyahı tərtib etdiyimiz günün ödənişini almalıyıq, o da verilmir".

Məsələ ilə bağlı Mərkəzi Seçki Komissiyasına sorğu ünvanlanıb.