Məşhur türkiyəli aparıcı, jurnalist, “TV8” kanalının rəhbəri, İngiltərənin “Championship” Liqasının komandalarından “Hull City”nin sahbib Acun Ilıcalı bir sıra cinayətlərdə ittiham edilərək həbs edilən təriqət lideri Adnan Oktarla əlaqəsinə aydınlıq gətirib.

Türkiyə mediası xəbər verir ki, Adnan Oktarla birgə çəkilmiş fotosu yayılan Acun Ilıcalı bunu bir müddət Adnan Oktarı özünə ruhən yaxın görməsi ilə əlaqələndirib.

Jurnalist Ənvər Aysevərin suallarını cavablandıran Acun Ilıcalı Adnan Oktarın ona “tələbəm” deməsi ilə bağlı bildirib:

“Anamın vəfat etdiyi vaxtlar idi. Özümə mənən yaxın hesab etdiyim dostlarımla birlikdə bir müddət orada oldum. Oradakı cəfəngiyyatları gördüyüm və olduğum mühiti bəyənmədiyim üçün də ayrıldım”.

Ilıcalı bildirib ki, Adnan Oktarla eyni fotoda olduqları yer Anıtqəbirdir:

“Düz 35 il əvvəl idi. Adnan Hocanı 1-2 il görmüşdüm. Fotonun çəkildiyi yer də Anıtqəbirdir. 35 ildir ki, onu görmürəm, əlaqəm də yoxdur. İndi bunun müzakirəsinin çox absurd olduğunu düşünürəm. Dinin və mənəviyyatın, yaxşı insan olmağın gözəl bir şey olmasından danışılırdı. Yaxşılıqdan, gözəllikdən, dostluqdan bəhs edilirdi. Ona görə də, diqqətimi çəlb etmişdi”.

Qeyd edək ki, Adnan Oktar 2018-ci ildə həyata keçirilən əməliyyatla həbs edilib. O, təşkilat rəhbəri olmaqla yanaşı, bir çox cinayətlərdə ittiham edilərək, ümumilikdə 8658 il həbs cəzası alıb.