Son vaxtlar bir çox onlayn alış-veriş platformasından planşet və tabletlərin tədarükü artıb. Daxili bazarda təklif olunan qiymətlərlə müqayisədə xeyli ucuz cihazlar yerli alıcıların ciddi marağına səbəb olur. Lakin mobil telefonlarda olduğu kimi, planşetlərin də bəzilərində SİM kart yuvası olduğu üçün onun deklorasiya edilməsi və İMEİ qeydiyyatdan keçirilməsi lazım gəlir.

Mövzu ilə bağlı danışan İKT İnformasiya Mərkəzinin direktoru Fərid Kazımov bildirib ki, planşet və tabletlər də mobil telefontək gömrükdə bəyan edilir:

“Ölkəyə istənilən telefonu gətirdikdə hava limanında heç bir maneə qoyulmur. Sadəcə aeroportdakı gömrük əntəqəsində mütləq şəkildə bəyan etməlisiniz. Əgər bu olunmursa, həmin telefonu İMEİ qeydiyyatdan keçirmək mümkün olmur. Bu isə vətəndaş üçün problemə çevrilir. Planşet və tabletlərdə də bu qayda belədir”. 

Fərid Kazımov qeyd edib ki, deklorasiya və İMEİ qeydiyyat şəxsin mobil cihazı necə istifadə edəcəyindən asılıdır:

“Kobud dildə desək, əgər özünüzlə gətirdiyiniz mobil cihazı nömrə ilə istifadə etmək istəyirsinizsə, mütləq şəkildə həm bəyan etməli, həm də İMEİ qeydiyyatdan keçirməlisiniz. Yox əgər, sadəcə WİFİ zonasında internetdə sörfinq üçün işlətmək istəyirsinizsə, buna ehtiyac yoxdur.

Hətta bəzi SİM kart girişi olan noutbuklarda eyni proses icra olunur. Bu həmin cihazın gələcəkdə satışı zamanı problemlərə də səbəb ola bilər. Məhz bu baxımdan nömrəli mobil cihazların gömrükdə deklorasiya edilməsi daha məqsədəuyğundur”.