Bakıda qətl törətməkdə təqsirləndirilən şəxs və dostu hakim qarşısına çıxarılıb.

Musavat.com xəbər verir ki, Bakı Ağır Cinayətlər Məhkəməsində İmran Cərullayevin cinayət işi üzrə məhkəmə araşdırması başa çatıb.

Məhkəmənin hökmü ilə 21 yaşlı İmran 17 il müddətinə azadlıqdan məhrum edilib. Bu cinayət işində xuliqanlıq əməli törətməkdə ittiham olunan 1997-ci il təvəllüdlü Elşad Əliyev isə 4 il müddətinə azadlıqdan məhrum edilib.

Elan olunmuş ittihamla İ.Cərullayev özünü təqsirli bilib və əməlindən peşman olduğunu deyib.

Məlum olub ki, hadisə Suraxanı rayonu ərazisində baş verib. Orxan İsayevin üzərində bıçaq xəsarətləri olan meyitinin aşkar olunması barədə rayon prokurorluğuna məlumat daxil olub. Faktla bağlı Suraxanı rayon prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb, müvafiq ekspertizalar təyin edilib.

İstintaqla hadisənin zərərçəkmişin tanışı İmran Cərullayev tərəfindən şəxsi münasibətlər zəminində aralarında yaranmış münaqişə zamanı törədilməsinə əsaslı şübhələr müəyyən edilib. İmran Cərullayev şübhəli şəxs qismində tutularaq istintaqa cəlb edilib.

İlkin məlumata görə, cinayəti törədən İmran Cərullayevin Orxan Musayevə 50 manat borcu olub. Mübahisə də bu səbəbdən başlayıb və qətllə nəticələnib.


Paylaş: