Tokioda keçirilən ilin ilk hərracında 238 kq çəkisi olan mavi üzgəcli ton balığı 114,2 milyon yenə (1 milyon 346 min 338 manata) satılıb.

TASS xəbər verir ki, bu barədə cümə axşamı hərrac təşkilatçıları məlumat yayıb.

Şimal Aomori prefekturasında tutulan balıq Tokioda keçirilən belə hərracların bütün tarixində qiymətinə görə dördüncü olub. Həm də dörd ildən sonra ilk dəfədir ki, mavi üzgəcli ton balığı hərracda 100 milyon yendən (1 milyon 180 min 998 manatdan) baha qiymətə satılıb.

Bu hərracda iştirak restoran biznesi üçün prestijli sayılır və ən bahalı balıqları dadmaq üçün növbəyə duran müştəriləri cəlb etməyə kömək edir.