ABŞ-ın F-16 döyüş təyyarəsi Suriyada Amerika hərbçilərinin yaxınlığında fəaliyyət göstərən Türkiyə Silahlı Qüvvələrinə məxsus pilotsuz təyyarəni vurub.

Adının açıqlanmasını istəməyən iki ABŞ rəsmisi bu barədə “Reuters” agentliyinə məlumat verib.

Bildirilib ki, ABŞ Türkiyə rəsmilərinə bir neçə telefon zəngi edərək, onların ABŞ quru qoşunlarının yaxınlığında əməliyyat keçirdikləri barədə xəbərdarlıq edib.

Mövzu ilə bağlı Pentaqondan rəsmi açıqlama verilib.

“Türkiyənin PUA-sı ABŞ-ın elan etdiyi məhdud əməliyyat zonasına daxil olub. Komandirlər ABŞ qüvvələrinə yarım kilometrdən daha yaxın olan PUA potensial təhlükə yaradıb və özünümüdafiə məqsədilə F-16 döyüş təyyarələri pilotsuz təyyarəni zərərsizləşdirib. Ərazidəki səlahiyyətli rütbəlilər risk görüb bu qərarı veriblər. Baş verənlərə görə təəssüflənirik. Türkiyə ilə əlaqə saxlayırıq. Türkiyə NATO-nun mühüm müttəfiqidir”, - açıqlamada deyilir.