Xəbər verdiyimiz kimi, türkiyəli müğənni, şair və bəstəkar Sezen Aksunun özünün yazdığı və 9 iyun 2017-ci ildə “Youtube”da yayımlanan “Şahanə bir şey yaşamaq” adlı mahnı son bir həftə ərzində Türkiyədə qalmaqala səbəb olub. Belə ki, onun mahnıda islam peyğəmbəri Adəm və həyat yoldaşı Həvvanı “cahil” adlandırması bəzi vətəndaşlar və ictimai-siyasi xadimlər tərəfindən sərt tənqid olunub. Sonuncu dəfə isə ölkənin Prezidenti Rəcəb Tayyib Ərdoğan məsləyə reaksiya verib və dini dəyərlərə dil uzadanları “dillərini qoparmaqla” hədələyib.

Bu günə kimi məsələ ilə bağlı heç bir açıqlama verməyən Sezen Aksu ötən gün sosial şəbəkələrdəki hesablarında yeni – 21 yanvarda yazdığı mahnı sözlərini paylaşıb və ona dəstək olanlara minnətdarlığını bildirib. Mahnı sözlərindəki “dilimi əzə bilməzsən” ifadələri isə diqqətdən yayınmayıb.

S. Aksu sonda 47 ildir yaradıcılıqla məşğul olduğunu və bundan sonra da yazmağa davam edəcəyini bildirib.