Virtualaz.org “Kommersant” nəşrinə istinadən xəbər verir ki, indiyə kimi Rusiyada iri neft aktivlərinə malik olmayan Azərbaycanın SOCAR neft şirkəti Dmitri Mazurovun “New Stream” qrupunun Antipino NEZ və neft yataqlarını ala bilər. Mənbənin bildirdiyinə görə, SOCAR 3 milyard dollarlıq borcu öz öhdəsinə götürmək şərtilə aktivlərin 100%-nə “simvolik məbləğ” ödəməklə alış haqqında “prinsipial razılıq” əldə edib.

Sövdələşmənin ilin sonuna kimi baş tutacağı bildirilir. Nəticədə, “New Stream” borclarının böyük hissəsindən qurtulacaq, şirkətin əsas səhmdarı olan Dmitri Mazurov isə sonradan satdığı aktivdə minoritar pay sahibi ola bilər.

İddia olunur ki, SOCAR Tümen vilayətində yerləşən Antipino NEZ-i bütünlükdə almaq niyyətindədir. Bu səhmdar cəmiyyətinə eyni zamanda “New Stream”in hasilat aktivləri – Orenburq vilayətindəki Moqutov yatağı, Qremyaçev və Vorontsov neft yataqlarının bir hissəsi daxildir.

Antipino NEZ-in ilkin emal gücü illik 9 milyon ton neftdir, zavod “Avro-5” sinifli dizel yanacağı və benzin istehsalı imkanına malikdir. Neft yataqlarının ehtiyatları 45,5 milyon ton həcmində qiymətləndirilir ki, sənaye hasilatı hələlik başlanmayıb, 2024-2025-ci illərdən başlayaraq illik 4 milyon ton hasilat nəzərdə tutulurdu.


Paylaş: