“Ailə Məcəlləsinin tələbinə əsasən valideynlər uşaqlarını saxlamağa borcludurlar. Aliment ödənilməsi barədə razılıq olmadıqda uşaqlar üçün onların valideynlərindən məhkəmə tərəfindən hər ay aşağıdakı miqdarda aliment tutulur“.

Bu fikirləri vəkil Elşad İsayev KONKRET.az-a açıqlamasında bildirib.

“1 uşağa görə—qazancın və (və ya) valideynlərin başqa gəlirlərinin dörddəbir hissəsi; 2 uşağa görə—qazancın (başqa gəlirlərin) üçdəbir hissəsi; 3 və daha çox uşağa görə—qazancın (başqa gəlirlərin) yarısı. Valideynlər arasında yetkinlik yaşına çatmayan uşaqlara aliment ödənilməsi barədə saziş yoxdursa, eləcə də aliment verməyə borclu olan valideynin qazancı (gəliri) qeyri-müntəzəm, dəyişəndirsə, o zaman alimentin miqdarı məhkəmə tərəfindən hər ay ödənilməli olan sabit pul məbləğində müəyyən edilə bilər. Uşaq tərəflərdən hər biri ilə qalıbsa, bu halda bir valideyndən digər aztəminatlı valideynin xeyrinə hər ay tutulan alimentin miqdarı Mülki Məcəllənin 78.2-ci maddəsinə uyğun olaraq məhkəmə tərəfindən sabit pul məbləğində müəyyən edilir.“

Vəkil vurğulayır ki, bundan əlavə məhkəmə aliment ödəməli olan şəxsin iddiası üzrə aliment borcunun şəxsin xəstəliyi və digər üzürlü səbəblərə görə əmələ gəldiyini, ailə və maddi vəziyyətinin bu borcları ödəməyə imkan vermədiyini müəyyən edərsə, onu həmin borcları ödəməkdən tamamilə və ya qismən azad edə bilər.”

Məhkəmə qaydasında tutulan alimentin ödənilməsinə aşağıdakı hallarda xitam verilir:

1) Uşaq yetkinlik yaşına çatdıqda və ya yetkinlik yaşına çatmamış tam fəaliyyət qabiliyyəti əldə etdikdə;

2) Aliment ödənilən uşaq övladlığa götürüldükdə;

3)Aliment alan şəxsin maddi yardıma ehtiyacının ödənildiyi və ya əmək qabiliyyətinin bərpa olunduğu məhkəmə tərəfindən müəyyən olunduqda;

4) Aliment alan və ya ödəyən şəxs öldükdə;

5) Əmək qabiliyyəti olmayan və ya aliment alan ər və arvad yeni nikaha daxil olduqda alimentin verilməsi dayandırılır”.