“Energetika sahəsi ölkə iqtisadiyyatının əsas dayaqlarından biri olaraq strateji əhəmiyyət kəsb edir”.

Bunu Milli Məclisin Təbii ehtiyatlar, energetika və ekologiya komitəsinin “İstilik təchizatı haqqında” qanun layihəsinin müzakirəsi məqsədilə bu gün təşkil etdiyi ictimai dinləmədə komitənin sədr müavini Fatma Yıldırım bildirib.

“Ona görə də bu sahə ilə bağlı vacib qanunların qəbul edilməsi təbii qanunauyğunluqdur. Bu qanunların qəbul edilməsi enerji istehsalında, idarəçiliyində və səmərəliliyində ciddi irəliləyişlərin əldə edilməsinə səbəb olub.

Məlumdur ki, bu qanunla istilik təchizatı sahəsinin tənzimlənməsində dövlət orqanlarının və tənzimləyicinin səlahiyyətləri, istilik təchizatı subyektlərinin hüquq və vəzifələri müəyyən edilir. Digər tərəfdən isə, düşünürəm ki, qanunun qəbulu gələcəkdə istehlakçıların istilik enerjisi təchizatının keyfiyyətini də yüksəldəcək. Bu qanun yeni tikilən çoxmənzilli binaların da istilik təchizatı ilə üzləşdiyi problemlərin həllinə kömək edəcək. Hesab edirəm ki, ictimai dinləmədə aparılan müzakirələr, fikirlər, verilən təkliflər ümumi işimiz üçün çox faydalıdır”, - deyə deputat qeyd edib.