Ucar rayonu Bağırbəyli kənd sakinləri bir neçə aydır ki, elektrik təsərrüfatında mövcud olan problemlərlə üz-üzə qalıblar. Kəndin müxtəlif hissələrində yerləşən elektrik dirəkləri hələ də taxtadan ibarətdir, qəzalı vəziyyətdədir. Sakinlərin sözlərinə görə, bu dirəklər istənilən anda aşaraq ciddi fəsadlara səbəb ola bilər.

Bir neçə ay əvvəl kənd ərazisinə metal konstruksiyalı yeni elektrik dirəkləri gətirilib və quraşdırılıb. Lakin yerli sakinlərin bildirdiyinə görə, bu dirəklərin bərkidilməsi düzgün aparılmayıb, dirəklərin dibinə beton tökülmədən, sadəcə torpaqla örtülərək yarımçıq vəziyyətdə quraşdırılıb. Nəticədə, həm köhnə, həm də yeni dirəklər təhlükə mənbəyi olaraq qalır.

“Biz sevindik  ki, yeni dirəklər qoyulacaq və kənddə elektrik sistemi yenilənəcək. Amma işin yarısında dayandılar. Beton tökülmədi, elektrik xətləri də hələ köhnə vəziyyətdədir. Güclü külək olanda qorxumuzdan çölə çıxmırıq,” deyə kənd sakinlərindən biri bildirir.

Bağırbəyli sakinləri məsələ ilə bağlı artıq aidiyyəti qurumlara, o cümlədən Energetika Nazirliyinə və “Azərişıq” ASC-yə rəsmi müraciət ünvanlayıblar. Onlar problemin tezliklə həll olunacağına və kənddə təhlükəsiz elektrik infrastrukturunun yaradılacağına ümid edirlər.

Mövzunu izləməyə davam edəcəyik.

Fuad Hüseynov