“Bizdə sıfırdan yeni Vergi Məcəlləsi yazılmalıdır. Hazırki Vergi Məcəlləsi yamaq-yamaqdır. Məcəllədə son 6-7 il ərzində minə yaxın əlavələr və dəyişikliklər qəbul olunub. Azərbaycanda daha sadələşdirilmiş bir Vergi Məcəlləsinə ehtiyac var”.

Bu sözləri Yenisabah.az-a açıqlamasında iqtisadçı-ekspert Natiq Cəfərli deyib. O, bildirib ki, hazırda ölkəmizdə vergi növləri həddən artıq çoxdur:

“Bizdə sıfırdan yeni Vergi Məcəlləsi yazılmalıdır. Hazırkı Vergi Məcəlləsi yamaq-yamaqdır. Məcəllədə son 6-7 il ərzində minə yaxın əlavələr və dəyişikliklər qəbul olunub. Azərbaycanda daha sadələşdirilmiş bir Vergi Məcəlləsinə ehtiyac var. Təkcə kiçik və orta sahibkarıq üçün yox, ümumiyyətlə hər kəs üçün sadələşdirilmiş olmalıdır. Bizdə həddən çox vergi növləri var. Vergilərin hesablanma qaydaları qəlizdir. Bütün bunlar sadələşdirilməlidir. Mən təklifim hər zaman belə olub ki, ölkədə iqtisadiyyat müəyyən sahələrə ayrılmalıdır. Həmin sahələrdə çalışanların dövriyyəsinə görə vergi hesablanmalıdır. Bu çox sadə və optimal yoldur. Hətta orta sahibkar üçün ayrıca mühasib saxlamağa belə ehtiyac qalmaz. İndi bizdə vergilər o qədər yüksəkdir ki, insanlar çalışır ki, mümkün qədər az vergi ödəsin. Elə bir sistem qurulmalıdır ki, iş adamlarından vergidən yayınmaq sərf etməsin”. 

Ekspert qeyd edib ki, büdcənin formalaşmasında kiçik və orta sahibkarlığın çəkisi 7 faizi keçmir:

"Məsələn, 200 min manatlıq limitlə bağlı bu illər ərzində dəhşətli dərəcədə çoxlu limit yaranırdı. İnsanlar o limiti aşmamaq üçün öz qohumunun, dostunun, tanışının, ailə üzvlərinin adına da ayrıca VÖEN-lər açırdı və dövriyyəsini bölürdü. Nəticə etibarı ilə, burada qeyri-real bir mənzərə yaradırdı. İqtisadiyyat Nazirliyi hər il deyirdi ki, VÖEN-lə çalışanların və kiçik sahibkarların sayı artır. Bəli, formal olaraq artırdı. Amma ona görə artırdı ki, dövriyyəni keçməmək üçün insanlar 1 VÖEN yerinə 5 VÖEN-lə işləyirdi. Bunun isə heç bir məntiqi yox idi. Ona görə də Azərbaycanda sadələşdirilmiş Vergi Məcəlləsinə mütləq şəkildə ehtiyac var. Bizdə kiçik və orta sahibkarlığın iqtisadiyyatdakı payının artırılması əsas hədəf kimi götürülməlidir. Bizim iqtisadiyyatda kiçik və orta sahibkarlığın payı çox aşağıdır. Büdcənin formalaşmasında onların çəkisi 7 faizi keçmir. İnkişaf etmiş ölkələrdə bu 55-60 faizdir. Gürcüstanın özündə belə 50 faiz civarındadır. Bunu biz hədəf kimi qoysaq, vergilər həm aşağı salınmalı, həm də sadələşdirilməlidir. Eyni zamanda yeni Vergi Məcəlləsi qəbul olunmalıdır”.