Son günlərdə ölkə ərazisində müşahidə olunan dəyişkən və qeyri-sabit hava şəraiti kənd təsərrüfatına ciddi təsir göstərməkdədir. Yaz fəslinin ortasında intensiv yağıntıların və soyuq havanın davam etməsi bağlarda çiçəkləmə prosesinə, taxıl və biçənək sahələrinə, ümumilikdə isə məhsuldarlığa mənfi təsir edir. Torpağa yeni əkilmiş toxumlar istisna olmaqla, bu cür hava şəraiti bir çox sahədə fəsadlara yol açır.

Əgər bu tendensiya uzun müddət davam etsə, mövsümün məhsul bolluğuna təsiri necə olacaq?

İqtisadçı Akif Nəsirli bu barədə sualları açıqlamasında cavablayıb. O, məhsuldarlığın aşağı düşmə ehtimalını təsdiqləyib:

“İndiki hava şəraiti kənd təsərrüfatına xeyirdən çox ziyan vurur. Ağacların çiçəklədiyi bir dövrdə müşahidə olunan intensiv yağıntılar bağlarda məhsuldarlığın aşağı düşməsinə səbəb olur. Bundan əlavə, yağış və güclü külək biçənəklərə, həmçinin taxıl zəmilərinə ciddi zərər yetirir. Belə hava şəraiti yalnız torpağa yeni əkilmiş toxumlar üçün qismən əlverişli sayılır.

Kənd təsərrüfatı üçün hava şəraiti həlledici rol oynayır. Bu cür qeyri-sabit durum qısamüddətli olarsa, təsirləri də məhdud olar. Lakin uzunmüddətli davam edərsə, bitkilərin yerüstü hissələrinə mənfi təsir göstərəcək, vegetativ inkişafı dayandıracaq və meyvə-tərəvəzin bazara çıxmasını gecikdirəcək”.

Ekspert qiymətlərdən də söz açıb:

“Artıq bir həftədir ki, ölkə ərazisində fasiləsiz yağıntı müşahidə olunur. Proqnozlara görə, gələn həftənin ilk günlərindən etibarən hava temperaturunun yüksələcəyi gözlənilir. Əgər bu məlumatlar təsdiqini tapsa, kənd təsərrüfatında ciddi problemlərin yaşanmayacağı ehtimal edilir. Lakin soyuq hava şəraiti davam edərsə, xüsusilə meyvə bağlarında məhsuldarlığın ciddi şəkildə azalacağı istisna olunmur.

Həmişə olduğu kimi, ilk nübar məhsullar bazara çıxanda qiymətlər yüksək olacaq. Daha sonra isə məhsuldarlığın artması ilə qiymətlərin ucuzlaşacağı proqnozlaşdırılır”.