ABŞ-ın xüsusi əməliyyatı ilə “Qüds” Qüvvələrinin komandanı general Qasım Süleymaninin qətlində iştirak etdiyi iddia edilən 48 nəfər barəsində cinayət işi başlanılıb.
Bu barədə İran məhkəmə sisteminin Mətbuat xidməti məlumat yayıb. 
“Qasım Süleymani iddiasında 48 müttəhim müəyyən olunub. Onların mühakimə olunması üçün lazımi addımlar atılıb”,- deyə açıqlamada bildirilib.
Qeyd olunub ki, İran generalın öldürülməsi ilə hər hansı bir şəkildə əlaqəli olan ölkələrə məlumatların verilməsi tələbi ilə sorğu göndərib.
“Son ölkə Almaniya idi. Almaniyadakı ABŞ-ın Ramştayn bazası ilə Süleymaninin öldürülməsində iştirak edən ABŞ pilotsuz təyyarələri arasında məlumat mübadiləsinin baş verdiyi barədə bizə məlumat daxil olub”,- deyə açıqlamada əlavə olunub.
Daha əvvəl İran Süleymaninin qətlində 30-dan çox şəxsin təqsirləndirildiyini açıqlamış, onların arasında ABŞ Prezidenti Donald Trampın da olduğunu bildirmişdi.
Xatırladaq ki, yanvarın 3-də gecə Bağdad aeroportu yaxınlığında ABŞ pilotsuz uçuş aparatı ilə endirilən raket zərbəsi nəticəsində İran İslam İnqilabı Keşikçiləri Korpusunun “Qüds” Qüvvələrinin komandanı general Qasım Süleymani öldürülmüşdü.


Paylaş: