Ötən həftə Rusiya prezidenti Vladimir Putin gərgin təhlükəsizlik tədbirləri altında ilk dəfə olaraq müharibə başlayandan bəri münaqişələrin ən şiddətli olduğu Mariupol bölgəsinə gedib.
Bölgədə çəkilmiş Rusiya prezidentinin foto və videoları yeni müzakirələrə səbəb olub.
Ukrayna daxili işlər nazirinin sabiq müavini Anton Geraşenko sosial media hesabında Putinin bəzi fotolarını yayaraq diqqətçəkən iddia irəli sürüb. Geraşenko iddia edib ki, Putin şəxsən Mariupola getməyib, öz oxşarını bölgəyə göndərib.
Geraşenko Putinin çənə və boyun bölgəsindəki fərqi də vurğulayıb:
“Putin, sənin çənənə nə olub? Son vaxtlar makiyaj mütəxəssisləri Putinin keyfiyyətsiz nüsxələri ilə işləmək məcburiyyətində qalıblar. Bu, tam olaraq oxşar deyil, amma bir nüsxədir”.

Geraşenkonun paylaşdığı fotolar arasında Putinin keçən il və son həftələrdə çəkilmiş fotolar var.
Digər tərəfdən, “Telegram”da Kremldən olan mənbələrin Putinin Krıma və Mariupola getdiyini inkar etdiyi iddiası irəli sürülüb.
Kreml bu iddialara münasibət bildirməyib.