"Bir il ərzində dünyada 1 milyon 300 mindən çox insan yol-nəqliyyat hadisələri səbəbi ilə həyatını itirir".

Bunu Medianın İnkişafı Agentliyinin (MEDİA) təşkilatçılığı ilə keçirilən "İctimai proseslər media müstəvisində" mövzusunda forum çərçivəsində "Nəqliyyat infrastrukturunda davamlı həllər media müstəvisində" adlı panel müzakirə zamanı Azərbaycan Respublikası Baş Dövlət Yol Polisi İdarəsinin Hərəkətin təhlükəsizliyinin təbliği və ictimai qurumlarla əlaqə şöbəsinin rəisi, polis polkovnik-leytenantı Rövşən Tağıyev deyib.

O bildirib ki, 5-10 yaş aralığında ölüm səbəbləri arasında yol-nəqliyyat hadisələri birinci yerdədir.

O, həmçinin qeyd edib ki, Azərbaycanda medianın gücü sayəsində avtoxuliqanlığa qarşı münasibət dəyişib:

"On il əvvəl avtoxuliqanlıq edənlər qəhrəmanlaşdırılırdısa, hazırda onlara qarşı mənfi münasibət var. Bu da insanların belə əməllərdən qaçmasına səbəb olub. Bu məsələdə medianın rolu danılmazdır".

R.Tağıyev, həmçinin qeyd edib ki, statistik nəticələrə görə, Azərbaycanda yol-nəqliyyat hadisələri və onlar nəticəsində baş verən ölüm hallarında azalma müşahidə edilir.