Britaniyanın dünyaca məşhur “The Economist” jurnalı son sayısının üz qabığını ABŞ Prezidenti Donald Trampın prezidentlik vəzifəsinin 100-cü gününə həsr edib.

Jurnalda ABŞ-ni simvolizə edən keçəl qartal yaralı və sarğılı təsvir edilib.

Nəşr həmçinin Trampın prezidentlik müddətinə “cəmi 1361 gün qaldığını” yazıb.

“Donald Tramp artıq Amerikaya ciddi ziyan vurub. Onun inqilabi layihəsi uğur qazanacaqmı?”, - deyə nəşrin “X” hesabında qeyd olunub.

Qeyd edək ki, ABŞ-nin sabiq prezidenti Co Bayden ötən ilin dekabrında keçəl qartalı ölkənin milli rəmzi kimi tanıyan qanunu imzalayıb. Konqres bu qanun layihəsini yekdilliklə qəbul edib. 

Keçəl qartal ABŞ-nin rəsmi sənədlərində 1782-ci ildən sonra istifadə olunur. Həmin il ABŞ Konqresi keçəl qartalı milli simvol elan etsə də, o, Birləşmiş Ştatların milli rəmzi kimi rəsmən tanınmayıb.