Bu ilin martın 1-nə Azərbaycanda sənaye və istehsala yönəldilmiş bank kreditlərinin həcmi illik müqayisədə 62,66 %, cari ilin əvvəlindən isə 0,94 % artaraq 2,299 milyard manata çatıb.

“Report”un Azərbaycan Mərkəzi Bankına (AMB) istinadən verdiyi xəbərə görə, bank sektoruna kredit qoyuluşunun ümumi həcmində bu sektorun payı 7,8 % təşkil edib.

Kreditləşmə baxımından ən sürətlə inkişaf edən ikinci sektor nəqliyyat və rabitə sektoru olub. Nəqliyyat və rabitə sahəsinə kredit qoyuluşu il ərzində 26,56 % artsa da, 2025-ci ilin əvvəlindən 0,1 % azalaraq 1,858 milyard manat (6,4 % payla) təşkil edib.

Xüsusi çəkisi 58,1 % olan istehlak kreditləşməsi də artmaqda davam edib. Ev təsərrüfatlarına verilən kreditlərin həcmi illik müqayisədə 20,41 %, ilin əvvəlindən isə 0,9 % artaraq 17,183 milyard manata çatıb.

Ticarət və xidmət sektoruna verilən kreditlər illik müqayisədə 16,14 % artsa da, 2025-ci ilin əvvəlinə nəzərən 0,49 % azalaraq 4,05 milyard manat (14,2% payla) təşkil edib.

Hesabat dövründə kənd təsərrüfatı və emal sahələrinə verilən kreditlər illik müqayisədə 12,09 % artsa da, 2025-ci il yanvarın 1-nə nəzərən 1,98 % azalaraq 575,225 milyon manata (12,09 %) düşüb.

Öz növbəsində, tikinti və daşınmaz əmlak sektorunun kreditləşməsi illik müqayisədə 2,5 % artsa da, ilin əvvəli ilə müqayisədə 2,72 % azalaraq 1,146 milyard manat təşkil edib.

Energetika, kimya və təbii ehtiyatlar yeganə sektordur ki, bank kreditləşməsi azalıb. Bu sektora verilən kreditlərin həcmi il ərzində 11,64 %, ilin əvvəlindən isə 0,79 % azalaraq 768,591 milyon manat təşkil edib.

2025-ci il martın 1-nə Azərbaycan iqtisadiyyatının real sektoruna kredit qoyuluşu illik müqayisədə 19,38 %, ilin əvvəlindən isə 0,39 % artaraq 29,066 milyard manata çatıb.