Ötən gün Prezident İlham Əliyev Rəqəmsal İnkişaf və Nəqliyyat Nazirliyi haqqında Əsasnamədə dəyişikliklər edilməsilə bağlı Fərman imzalayıb.

Dəyişikliyə görə RİNN rəqəmsal inkişaf və süni intellekt sahələrində dövlət siyasətini və tənzimləməni həyata keçirən mərkəzi icra hakimiyyəti orqanı olacaq.

Xatırladıram ki, hazırda süni intellektlə bağlı ölkədə iki qurum, RİNN tərəfindən yaradılan Azərbaycan Süni İntellekt Laboratoriyası və Prezident tərəfindən İN tabeliyində yaradılan “Dördüncü Sənaye İnqilabının Təhlili və Koordinasiya Mərkəzi” (4SİM) fəaliyyət göstərir.

Ədalət naminə qeyd etmək lazım ki, 4SİM sektorda hələlik daha aktiv görsənir.

Hələlik süni intellektin inkişafı ilə əlaqəli hər hansı konseptual sənəd ortada yoxdur. Baxmayaraq ki, hər iki qurum belə bir sənəd layihəsinin hazırlandığını elan ediblər.

Eyni zamanda süni intellektin inkişafı üçün hamının bəhrələnə biləcəyi Superkompüter Mərkəzi də ölkəmizdə hələlik yaradılmayıb.

Ümid edək bundan sonra RİNN süni intellekt sahəsində səylərini daha da gücləndirəcək.

Yeri gəlmişkən, qeyd etmək istərdim ki yuxarıda adı çəkilən Fərman əsasında RİNN-nin İKT, rəqəmsal hökumət və nəqliyyat sahəsində də səlahiyyətləri xeyli genişləndirilib və dəqiqləşdirilib.

Osman Gunduz