"Koronavirus pandemiyası dünyada 3 milyon 200 mindən çox insanın həyatına son qoyub. Pandemiyanın necə başladığı bəlli deyil və onun mənşəyini tapmağı hədəfləyən ilk cəhd boşa çıxdı. Bir neçə həftəyə Ümumdünya Səhiyyə Təşkilatı (ÜST) və üzv ölkələr pandemiyanın necə və harada başlaması üzrə etibarlı tədqiqata başlamalıdırlar”.

Bu "The Washington Post” qəzetinin redaksiya məqaləsində yazılıb.

Məqalədə qeyd olunur ki, ÜST-nin Çinlə birgə araşdırması belə bir qənaətə gəldi ki, koronavirus heyvanlardan insanlara birbaşa, yaxud dolayısı ilə keçib: "Amma Çinin vilayətlərində 80 mindən çox vəhşi, ev heyvanından götürülmüş nümunələrdən bircəciyində belə virus tapılmayıb. Tədqiqat komandası virusun Vuhanda laboratoriyadan sızması versiyasına çox az ehtimal verdi".

Qəzet bu versiyanın heç araşdırılmadığını qeyd edir. Axı, Vuhan Virusologiya İnstitutunun yarasa koronavirusları üzərində riskli eksperimentlər apardığı bəllidir. Çin də virusun laboratoriyadan sızması versiyasını cidd-cəhdlə rədd edir.

"Ötən cümə günü bir qrup alim açıq məktubda virusun bütün mümkün mənşələrinin tam elmi və ekspertiza tədqiqatını aparmağa çağırıb. Məktubda sözügedən laboratoriya və onun işilə bağlı bəzi suallar da qoyulur. Alimlər indiyədək SARS-CoV-2-yə bağlı koronavirusların daha çox Çinin Yunnan vilayətindəki Mojianq şaxtasından qaynaqlandığını bildirir. 2012-ci ildə həmin yerdə altı nəfər qəribə xəstəliyə tutulub, üçü həmin şaxtada yarasa təmizləyəndən sonra ölüb", - deyə məqalədə vurğulanır.



Paylaş: