Məlum olduğu kimi, yanvarın 27-də İrandakı səfirliyimizə yönələn xain terror hücumu baş verdi. Nəticədə səfirliyimizin bir əməkdaşı şəhid oldu, iki nəfər yaralandı. Tehrandakı diplomatik korpusumuz təhlükəsizlik səbəbindən Azərbaycana qayıtdı.

Hadisə baş verən ilk saatlardan İran rəsmiləri və mətbuatı hadisəyə rəzil don geydirməyə çalışdılar. Onlar hər vəchlə hücumun ailə münaqişəsi olduğunu əsaslandırmaq taktikasını seçdilər.

Bu yetmirmiş kimi, terrorçudan, cinayətin törədilməsindən bir neçə saat sonra müsahibə götürüb, onu kütləvi tirajlamaqdan belə çəkinmədilər.

Açıq şəkildə terror olduğu görünən olayla bağlı Azərbaycan hadisənin obyektiv araşdırılmasını qarşı tərəfdən tələb edir. İran tərəfi isə öz davranışları ilə obyektiv araşdırmadan nə qədər uzaq olduqlarını göstərməyə davam edir.

Belə ki, terrorun tətikçisi Yasin Hüseynzadə ruhi dispanserə yerləşdirilib. Tehran Cinayət Prokurorluğunun qənaətinə görə, Y.Hüseynzadə şizofreniya da daxil olmaqla bir sıra psixi problemlərdən əziyyət çəkirmiş.

Yəni deyirlər, dəlidir, nə etsə yeridir...

İranın terrorçunu dəli elan etməklə nəyi hədəflədiyini təxmin etmək elə də çətin deyil. Görünür, İran mollaları bu yolla terrorçunu cinayət məsuliyyətindən qurtarmağa çalışırlar.

Yasini psixi xəstə kimi göstərmək İran hakimiyyəti üçün də vacib məsələdir. Çünki istintaqın gedişində dəlilik kartı mütləq şəkildə qabardılacaq. Bununla da terror ehtimalını minimuma endirib, özlərinin “ailə münaqişəsi” feykinə dəlil kimi önə sürəcəklər.

Son nəticədə hücumun İran hakimiyyəti ilə bağının olmadığını sübuta yetirməyə çalışacaqlar.

İran tərəfinin son açıqlamaları da molla rejiminin olayın ssenarisini bu formada uydurmaq istədiyini görməyə yetir. Məsələn, İran parlamentinin spikeri Məhəmməd Baqir Qalibaf hücumun terror kimi dəyərləndirilməsinə qəti etiraz edib. Ölkə mətbuatı isə Yasinin “dəliliyini” aktiv şəkildə tirajlayırlar.

Bir sözlə, mollalar kor tutduğunu buraxmaz məntiqilə hərəkət edirlər. Elə düşünürlər ki, başlarını Quma soxduqları üçün heç kim onları görməyəcək.

Amma görünən dağa nə bələdçi.

Hücumun görüntülərini izləyən uşaq belə terrorun xeyli əvvəldən planlaşdırıldığını görmək üçün yetib. Məsələyə digər prizmadan da baxaq. Mollalar deyir ki, Yasinin psixi problemləri olub, yəni dolayısı ilə hücumu affekt vəziyyətində törədib. Fərz edək ki, belədir. O zaman suallar ortaya çıxır:

Necə ola bilər ki, affekt vəziyyətində olan şəxs səfirliyin qapısının içəridən açılması üçün maşını digər avtomobilə çırpıb, səs-küy yaradıb? Psixoloji problemli, affekt vəziyyətində olan şəxs bu cür detallı planı qura bilərdimi?

Tutaq ki, Yasin dəli idi. Bəs, İran polisi hara baxırdı? Yarım saatdan çox səfirliyin qarşısında olan şəxsi saxlamaq üçün niyə bir polis əməkdaşı gəlmədi? Səfirliyin qarşısında növbə çəkən polis niyə hadisəni izləməklə yetindi, sonra isə qeybə çəkildi?

Nə deyək, düşmənin ağıllısına da həsrət qalmışıq. Molla rejimin bu ağılla indiyədək hakimiyyətə qalması da möcüzədir. Amma bu günlər mollaların taxtdakı son zamanlarıdır. Taxt artıq silkələnib. Çox keçməz, mollalar viran qoyduqları İranın dağıntılarına gömülərlər.

Bizim.Media