Ukrayna dronlarının Novorossiyskə etdiyi kütləvi hücum Rusiya üçün Qara dənizdəki planların dönüş nöqtəsi ola bilər.

Moderator.az "TSN"-ə istinadla xəbər verir ki, bu barədə Ukraynalı jurnalist və publisist Vitali Portnikov öz video bloqunda danışıb.

Onun sözlərinə görə, limana edilən zərbə Rusiya Qara dəniz donanmasının hərbi infrastrukturuna zərər vurmaqla yanaşı, Kremlin Sevastopolu donanmanın əsas bazası və regionda təsir mərkəzinə çevirmək üçün uzunmüddətli strategiyasını da sual altına alıb.

“Novorossiyskə zərbələr Sevastopolun Qara dəniz donanmasının möhkəm bir qalasına çevrilməsi və regionda təzyiq vasitəsi kimi istifadə edilməsi planlarının iflasa uğramasından xəbər verir. Bu layihə boşa çıxdı”, – deyə Portnikov qeyd edib.

O həmçinin Rusiyanın Krımı işğal etməzdən əvvəl Sevastopolun qorunması üçün nə qədər siyasi və diplomatik səylər sərf etdiyini xatırladıb, və xüsusilə Ukrayna ərazisində donanmanın qalmasına icazə verən Xarkov Razılaşmalarını qeyd edib.

Lakin Rusiya ilə Ukrayna arasındakı genişmiqyaslı müharibənin başlanmasından sonra Qara dəniz donanması Sevastopolu tərk edərək, Novorossiyskdə müvəqqəti sığınacaq tapmağa məcbur olub.

"Amma Novorossiyskdə də donanma komandası özünü təhlükəsiz hiss edə bilmir. Bir-birinin ardınca gəmilər vurulur, liman isə Ukraynanın yeni hücum hədəfi olur", – deyə jurnalist vurğulayıb.

Portnikov ayrıca qeyd edib ki, Novorossiysk yalnız hərbi baza kimi deyil, həm də Rusiyanın neft ixracı üçün kritik əhəmiyyət kəsb edir. Limandakı obyektlərin zədələnməsi Rusiyanın neftini Qlobal Cənub ölkələrinə daşıma imkanlarını məhdudlaşdıraraq, dövlət büdcəsinə ağır zərbə vuracaq.

“Satılmayan hər bir barel Rusiya nefti ölkənin hərbi büdcəsinə və siyasi-müdafiə planlarına vurulan zərbədir”, – deyə o, əlavə edib.

Portnikov əmindir ki, yalnız simmetrik cavab, yəni Rusiyanın hərbi və enerji infrastrukturlarına hücumlar, işğalçını dayandırmağa və müharibə aparmaq üçün olan resurslarını yox etməyə qadirdir.

Qeyd edilir ki, 6 iyul gecəsi və səhər saatlarında Rusiya Federasiyasının Krasnodar vilayətinin Novorossiysk dəniz limanı dəniz və hava dronları ilə kompleks hücuma məruz qalıb. Şəhərdə bir neçə saat həyəcan siqnalları çalınıb və hava hücumundan müdafiə qüvvələri işləyib.