Sentyabrın 23-də Polşanın paytaxtı Varşava şəhərində ATƏT-in Demokratik Təsisatlar və İnsan Haqları Ofisinin təşkil etdiyi illik sammitdə Ermənistanın girov götürdüyü Dilqəm Əsgərov və Şahbaz Quliyevin taleyi barədə məsələ qaldırılıb.

Azərbaycan Demokratiya və İnsan Haqları İnstitutunun rəhbəri Əhməd Şahidov konfransda Azərbaycan hökumətinin əsirlərin “Hamının–hamıya” prinsipi ilə dəyişdirilməsi təklifini konfransdan bir həftə əvvəl rəsmi şəkildə Ermənistan hökumətinə və beynəlxalq təşkilatlara ünvanladığını bildirib. Rusiya xarici işlər naziri Sergey Lavrov isə oktyabrın 3-də “Valday” diskussiya klubunun XVI sammitində Dilqəm Əsgərov və Şahbaz Quliyevin taleyi ilə bağlı açıqlama verərək girovların dəyişdiriləcəyini vurğulayıb.

Maraqlıdır, bununla bağlı girovların ailə üzvlərinə məlumat verilib?

Məsələ ilə bağlı Cebhe.info-ya açıqlama verən Şahbaz Quliyevin qardaşı Manaf Quliyev qeyd edib ki, hadisənin gedişatı ilə bağlı, ümumiyyətlə, ailə üzvlərinə heç bir məlumat verilmir:

“Biz bütün baş verənləri televizordan izləyirik. Amma oktyabrın 1-i video əldə etmişik. Biz Beynəlxalq Qırmızı Xaç Komitəsində videonu izlədik. Qardaşım videoda ancaq ailə üzvlərimizə salam göndərirdi. Əlavə nəsə deməyinə icazə vermirlər. Biz əslində, məktub gözləyirdik, çünki həmişə məktub göndərəndə, cavab da məktubla olurdu. Videodan üç həftə əvvəl biz məktub göndərmişdik. Video ona cavab olaraq gəlib. Girovların dəyişdirilməsi ilə bağlı da bizə məlumat verməyiblər. Amma bir neçə gün əvvəl il sonunadək bunun mümkün olacağını dedilər. Bizə şəxsi olaraq bununla bağlı heç nə deyilməyib. Heç kimə müraciət də edə bilmirik. Çünki bilmirik ki, problemi kimə deyək. Məsələ ilə dövlət məşğul olduğu üçün onlardan bir cavab gözləyirik. Əgər prezidentlər razılaşsalar, girovların dəyişdirilməsinin mümkün olacağı deyilir”.


Paylaş: