Rusiya Prezidenti Vladimir Putinin səhhətinin pis olması ilə bağlı məlumatlar təkzib edilib.

Bu barədə Rusiyanın xarici işlər naziri Sergey Lavrov məlumat verib.

"Vladimir Putin hər gün ictimaiyyət qarşısına çıxır. Siz onu televiziya ekranlarında izləyə, çıxışlarını oxuya və dinləyə bilərsiniz. Düşünmürəm ki, ağlı başında olan insanlar bu insanda hansısa xəstəlik və ya xəstəlik əlamətlərini görə bilsinlər", - Lavrov deyib.

Qeyd edək ki, MI6 (Böyük Britaniyanın xarici kəşfiyyat xidməti) mənbələrinin iddiasına görə, Rusiya liderinin səhhəti ilə bağlı fərziyyələr fonunda Vladimir Putin artıq ölmüş ola bilər. Bu barədə ölkənin nüfuzlu  “Daily Star” nəşri məlumat yayıb.

İddia olunur ki, ola bilsin bu həqiqətən də baş verib və Kremldəkilər hakimiyyəti itirməmək üçün Putinin dublyorundan istifadə edirlər. MI6-nın yüksək vəzifəliləri Rusiya Prezidentinin son vaxtlar ağır xəstə olduğunu, lakin onun ölümünün çox güman ki, ört-basdır edildiyini deyirlər.