İsrail döyüş təyyarələri mühasirədə olan Qəzzə zolağındakı bir bölgəyə zərbələr endiriblər.

İsrail Ordusunun sözçüsü Aviçay Adrae tvitter hesabından verdiyi açıqlamada, döyüş təyyarələrinin bu gecə Qəzzədəki Həmas qruplaşmasına məxsus raket istehsalı xammalının yerləşdiyi bir nöqtəni hədəf aldığını bildirib.

Adrae qeyd edib ki, hücum 11 fevralda Qəzzədən İsrailə atılan raket səbəbilə baş verib.

Qəzzada olan şahidlər İsrailin hava zərbələrini təsdiqləyərək bombalanan ərazilərdə və onların yaxın ətraflarında maddi ziyanın olduğunu bildiriblər.

Hücum nəticəsində ölən və ya yaralananların olub-olmaması ilə bağlı hələlik rəsmi açıqlama verilməyib.