Azərbaycan Mərkəzi Bankının (AMB) sentyabrın 10-da verdiyi qərara əsasən, uçot dərəcəsi 7%, faiz dəhlizinin aşağı həddi 6%, faiz dəhlizinin yuxarı həddi isə 8% səviyyəsində dəyişməz saxlanılıb. Bildirilib ki, bu, faktiki inflyasiyanın proqnoz trayektoriyasına uyğunluğu və onun hədəflə (4±2%) müqayisəsi, son qlobal iqtisadi proseslər, daxili makroiqtisadi mühit, valyuta bazarında davam edən sabitlik, həmçinin pul siyasəti qərarlarının ötürücülük mexanizmi nəzərə alınmaqla qəbul edilib.

Globalinfo.az-a danışan iqtisadçı Elçin Rəşidov deyib ki, AMB-nin qərarının əsas məqsədi məzənnəni sabit saxlamaqdır:

“Manat kütləsi və faiz dərəcələri elə tənzimlənir ki, dolların məzənnəsi dəyişməsin. Nəticədə faiz siyasəti yalnız dar bir çərçivədə hərəkət edə bilir və bu da kreditlərin ucuzlaşmasına imkan vermir. Hazırda ABŞ-da dolların ucuzlaşması və inflyasiya gözləntiləri müşahidə olunur. Azərbaycan manatı dollara sıx bağlı olduğundan bu proses ölkəmizdə də inflyasiya riski yaradır. Belə şəraitdə kredit faizlərinin aşağı düşməsi real görünmür. Əksinə, inflyasiya təzyiqlərini azaltmaq üçün AMB faiz dərəcələrini artırmaq məcburiyyətində qala bilər. Bu isə iqtisadi aktivliyi daha da zəiflədir”. Pepperoni pizza

İqtisadçı qeyd edib ki, manatın dollara bu qədər bağlı olması AMB üçün “komfort zona” yaratsa da, iqtisadiyyatı tələyə salır və qeyri-neft sektorunun inkişafını məhdudlaşdırır:

“Son illərdə iqtisadi artım ya çox zəif olub, ya da ümumiyyətlə müşahidə edilməyib. İqtisadiyyat Nazirliyinin təqdim etdiyi statistikalar isə inflyasiya nəzərə alınmadan verildiyi üçün real mənzərəni əks etdirmir”.