Beynəlxalq hüquqa əsasən, Rusiya nüvə silahından istifadə edə bilməz. Bu, mümkün deyil. Nüvə silahına malik olan ölkələr ehtimal edilən hər hansı müharibə zamanı bir-birinə qarşı bu silahdan istifadə etməyəcəyinə dair öhdəlik götürüb.

Qeyri-nüvə dövlətlərinə qarşı isə ümumiyyətlə, bu silahdan istifadə edilməsi qəti qadağandır. Ukrayna da qeyri-nüvə dövlətidir və Rusiyanın bu ölkəyə qarşı nüvə silahından istifadə etməsi hüquqi baxımdan mümkün deyil.

Bu fikirləri Bakupost.az -a beynəlxalq hüquq üzrə professor Fərhad Mehdiyev deyib.

O bildirib ki, Rusiyanın başqa bir ərazisinə hərbi müdaxilə olsa belə, sözügedən ölkə nüvə silahından istifadə edə bilməz. Rusiya yalnız paytaxtına doğru ordu yeridiləcəyi təqdirdə bu silahdan istifadə edə bilər:

“Beynəlxalq Ədalət məhkəməsinin müvafiq qərarına əsasən, dövlətin mövcudluğuna təhlükə yaranacağı təqdirdə həmin dövlət nüvə silahından istifadə edə bilər. Digər hallarda yox”.