“Azərbaycan koronavirusla bağlı ən çətin dönəmi yaşayır. Yoluxmaların sayı artıb və bu, davam edir. Hazırda əvvəlki aylara nisbətən yoluxan şəxslərdə ağırlaşma müşahidə olunur. Bu, həkimlərdən asılı məsələ deyil. Belə davam edəcəksə, karantin rejiminin daha da sərtləşdirilməsi mümkündür. Dövlət buna məcburdur. Daha təhlükəli vəziyyətlə üzləşə bilərik. Atılan addımlar dünya praktikasına uyğunlaşdırılır. Çalışırıq ki, ölkədə yoluxmaların sayı azalsın. Burada hələki tək çarə vətəndaşların tövsiyələrə riayət etmələridir. Bu, xəstəliyin şiddətinin qarşısını almaqda yardımçı olacaq”.
 
Bunu Pravda.az-a açıqlamasında Milli Məclisin deputatı, tanınmış ürək-damar cərrahı Rəşad Mahmudov deyib.
 
R.Mahmudov vətəndaşları həmrəyliyə səsləyib: “Xəstəliyin artma tempi belə davam edərsə, inanın, çox sadə xəstəliklərin belə müalicəsi imkansız hala gələ bilər. Azərbaycanın hər bir vətəndaşı məsələnin ciddiyyətinin fərqindədir. Qaydalara riayət edilməlidir. Hamını həmrəyliyə dəvət edirəm, özümüzü qoruyaq”.


Paylaş: