Xəbər verdiyimiz kimi, bir neçə gün əvvəl Bakı Ağır Cinayətlər Məhkəməsinin hakimi Samir Əliyev infarkt keçirərək vəfat edib. Ümumiyyətlə, son dövrlərdə qəfil infarkt və ani ölüm hallarının artdığı bildirilir. Müşahidələrə əsasən, sağlam görünən və heç bir ciddi şikayəti olmayan insanlar belə, bu vəziyyətlə üzləşirlər. Sözügedən tendensiya cəmiyyətdə haqlı narahatlıq doğurur.

Globalinfo.az-a danışan kardioloq Jalə Abbasova deyib ki, ürəkdə ağrı olub-olmamasından asılı olmayaraq, vətəndaşlar mütləq müayinə edilməlidirlər:

“İrsi faktor varsa, nəsildə, qohumlar arasında qəfil ölümlər olursa, mütləq həkimə getmək lazımdır. Bəzən ürəyi ilə bağlı heç bir problem yaşamayan biri müayinədə fərqli vəziyyətlə qarşılaşır. Xəstənin elektrokardioqrafiyası (EKQ) normaldırsa, stress testi edirik. Bu da qaydasındadırsa, şübhələndiyimiz üçün ürəyin struktur quruluşuna baxılır. Ümumiyyətlə, vətəndaşlar ildə iki dəfə ümumi kardioloji müayinədən keçməlidir”.

Mütəxəssis bildirib ki, ölüm sayının artma səbəbi əsasən, zərərli vərdişlərlə bağlıdır:

“Oğlanlardan əlavə, qızlar arasında da ürək problemi artıb. Bəzilərində siqaret, narkotik, içkiyə görə sonsuzluq yaranır və sair. Yaxud gənc olmasına rəğmən, psixoloji problemi var, əsəbidir və ya immun sistemi zəifləyir, damar divarlarında iltihab prosesləri yaranır. Bütün bunlar ürək çatışmazlığı və digər xəstəliklərə gətirib çıxarır. Adi qol və kürək ağrısı belə, ürək xəstəliyinin xəbərçisi ola bilər”.