Gürcüstanın Baş naziri İrakli Kobaxidze Gela Geladzeni daxili işlər naziri təyin edib.

O, bu barədə keçirdiyi brifinqdə deyib.

“Mən Vaxtanq Qomelauriyə görülən işlərə görə təşəkkür etmək və Daxili İşlər Nazirliyinin yeni rəhbəri Gela Geladzeni təqdim etmək istəyirəm”, - baş nazir bildirib..

Qeyd edək ki, Gürcüstanın daxili işlər naziri Vaxtanq Qomelauri bu gün səhər saatlarında istefa verib:

“10 ildən çoxdur ki, Gürcüstanın daxili işlər naziri, Dövlət Təhlükəsizliyi Xidmətinin rəhbəri və baş nazirin müavini vəzifələrində çalışmışam. Təbii ki, bu qədər il ərzində belə yüksək dövlət vəzifələrində çalışmaq çox əmək və enerji tələb edib. Bu gün ölkədə vəziyyətin sabitliyindən istifadə edərək özümə icazə verdim”.

O, hakim “Gürcü arzusu” partiyasının komandasına sadiq qaldığını və gələcəkdə dövlətin yanında durmağa hazır olduğunu bəyan edib.