Yaponiyanın məşhur karate ustadı, Dünya Şotokan Karate Federasiyasının baş təlimatçısı Hitosi Kasuya Azərbaycana gəlib.

Modern.az xəbər verir ki, Karate-Do Federasiyaları Assosiasiyasının dəvəti ilə Bakıya gələn məşhur karate ustadı ənənəvi seminarlar keçirib.

Eyni zamanda, karateçilərimiz arasında kəmər dərəcələrinin artırılması ilə bağlı imtahanlar təşkil edilib və imtahandan uğurla keçənlər Dünya Federasiyanın müvafiq sertifikatları ilə təltif olunublar.

Avropa və Dünya çempionumuz Ülvi Quliyev Dünya Şotokan Karate Federasiyasının (WSKF) Texniki komitəsinin 22.12.2019 tarixli qərarı ilə karatenin inkişafında xüsusi xidmətlərinə görə 8- ci dan qara kəmər dərəcəsinə layiq görülüb.

Qeyd edək ki, Ülvi Quliyev beşinci çağırış Milli Məclisin deputatı, parlamentin Gənclər və idman komitəsinin sədridir. Azərbaycan Karate-Do Federasiyaları Assosiasiyasının prezidenti Ülvi Quliyev “Azərbaycan Respublikasının Əməkdar İdman ustası”, “Azərbaycan Respublikasının Əməkdar məşqçisi”, “Əməkdar Bədən Tərbiyəsi və İdman Xadimi” fəxri adları ilə təltif olunub. Karateçilərə rəhbərliyi dövründə çox sayda Azərbaycan gənci Avropa, Dünya çempionu adını qazanıb. Artıq bütün dünyada tanınıb qəbul edilən Azərbaycan karate məktəbinin təməlində Ülvi Quliyevin danılmaz xidmətləri, mübarizə və qələbə əzmi nümunəsi də dayanır.


Paylaş: