“Hansısa xoşagəlməz addım atmağa meyilli şagirdlər yoxlanılmalıdır”.

Bunu açıqlamasında təhsil eksperti Kamran Əsədov söyləyib. O, məktəbdə baş verən cinayət hadisələrinə xüsusi diqqət ayrılmalı olduğunu söyləyib:

“Azərbaycanın 4432 ümumtəhsil məktəbində 1,6 milyon şagird təhsil alır. Etiraf edək ki, mövcud qanunvericiliyin tələbinə görə pandemiya dövründə uşaqların məktəbə girərkən yalnız istilikləri ölçülür. Amma bəzən şagirdlərin məktəbə soyuq silahla gəlişinə diqqət yetirilmir. Halbuki xoşagəlməz hadisələrə konkret nümunələr var. Hansısa xoşagəlməz addım atmağa meyilli olan uşaqlar yoxlanılmalıdır. Bunun üçün məktəblərin girişində dövlət büdcəsinin vəsaiti hesabına turniketlər və yoxlama cihazları quraşdırılmalı, şagirdlər kəsici, deşici alətlərlə məktəbə buraxılmamalıdır.

Təəssüf ki, qanunvericilik təhsil müəssisələrində şagirdin üzərində yoxlama keçirilməsinə icazə vermir. Amma son bir ayda Tovuz, Ağstafada və Bakının bir neçə məktəbində şagirdlər arasında bıçaqlanma hadisəsi baş verib. Deməli, soyuq silahla törədilən kriminal hadisələrin doğurduğu narahatlıq nəzərə alınmalı, bu istiqamətdə qabaqlayıcı addımlar atılmalıdır”.