İraqın şimalında Türkiyə sərhədindən 60 km aralıda yerləşən Duhok şəhərində müəmmalı helikopter qəzası baş verib. 

Xarici KİV xəbər verir ki, qəzada terror təşkilatı PKK-nın 7 üzvü həlak olub.

Helikopter naməlum səbəbdən qəzaya uğrayıb. Hadisə yerində olan ikinci helikopterin hara getdiyi bəlli deyil.

Qəza nəticəsində aralarında qadınların da olduğu 7 nəfər ölüb. Məlumata görə, ölənlərdən 4-ü kişi, 3-ü qadın olub. Onların yaşlarının 25-45 arasında olduğu bildirib. 

Hadisə şahidləri ərazidə iki helikopterin uçduğunu bildiriblər. Helikopter qəzaya uğrayarkən böyük bir partlayış səsi eşidilsə də, bunun helikopterdəki sursatdan qaynaqlandığı düşünülür. Digər tərəfdən, ikinci helikopterin hara endiyi və kimləri daşıdığı bəlli deyil.

Hadisədən sonra KRG-nin terrorla mübarizə xidməti "İlkin təsbitlərə görə, helikopter Eurocopter AS350 tipli olub və ölənlərin bir qismi PKK yaraqlıları olub" deyib.