Oğuz Rayon İcra Hakimiyyəti etdiyi məsuliyyətsizliyə görə şəhid ailələrindən üzr istəyib.

Bu barədə Oğuz rayonundakı Şəhidlər xiyabanında aparılan təmir zamanı şəhid qəbirləri üzərindəki əklillərin İcra Hakimiyyəti tərəfindən zibilliyə atılmasına etiraz edən şəhid ailələri məlumat verib.

Məlumata görə, bu gün Oğuz Rayon İcra Hakimiyyəti qarşısında bir qrup insan toplaşıb, baş vermiş hadisəyə etiraz edib. Oğuz Rayon İcra Hakimiyyətinin başçısı Eyvaz Qurbanov şəhid ailələrini icra hakimiyyətinin inzibati binasına dəvət edib və baş vermiş hadisəyə görə onlardan üzr istəyib.

Qeyd edək ki, Şəhidlər xiyabanının təmir zamanı şəhidlərin üzərinə qoyulan əklillərin toz olduğunu görən şirkət bundan çıxış yolu kimi həmin əklilləri Şəhidlər xiyabanına bitişik Emin Abdullayev adına 2 saylı məktəbin həyətinə qoyaraq üzərinə də örtük çəkiblər ki, əklillər toz olmasın. Daha sonra isə Oğuz Rayon İcra Hakimiyyətinin başçısı Qurbanov Eyvazın müavini – Sosial-iqtisadi inkişafın təhlili və proqnozlaşdırılması şöbəsinin müdiri Yusubov Etibarın göstərişi ilə həmin əklillər zibilxanaya tökülmüşdü. Zibilliyə əklillərlə yanaşı Azərbaycan və Türkiyənin bayraqları da atılmışdı.





Paylaş: