Xalq artisti Ağadadaş Ağayev vəkili Asim Abbasovla birlikdə videomüraciət yayımlayıb. O, məhkəmənin özü ilə bağlı verdiyi hökmün ictimaiyyətdə yanlış anlaşıldığını deyib.

Xalq artistinin vəkili Asim Abbasov mətbuatda Ağadadaş Ağayevlə bağlı verilən hökmün yanlış formada tirajlandığını bildirib: 

“Ağadadaş Ağayevlə bağlı verilmiş hökmün şərti hesab edilən hissəsini mətbuatda yanlış formada tirajladılar. Hökmün əvvəlini tirajladılar, şərti olmasını isə qeyd etmədilər. Cəzanın şərti hesab edilməsi o deməkdir ki, Ağadadaş Ağayevin həyatında elə bir ciddi dəyişiklik yoxdur. Xalq artisti ailəsinin yanındadır və işini eyni formada davam etdirir. Sadəcə bir sınaq müddəti qoyulub və bu müddət ərzində o, öz davranışları və hərəkətləri ilə islah olunduğunu göstərməlidir. Daha sonra isə şərti hissə ləğv edilir və məhkumluq ödənilmiş sayılır”.

Ağadadaş Ağayev isə deyib ki, özünün heç bir davranışına və fəaliyyətinə məhdudiyyət qoyulmayıb:

“Mənim başıma ilk dəfə belə bir iş gəldi. Bu yaşıma qədər məhkəmə qarşısında heç vaxt olmamışdım. Mən o vaxtlar da söyləyirdim ki, hüquqi bir dövlətdə yaşayıram. Qanun bütün Azərbaycan vətəndaşları üçün eyni məna daşıyır. Mənim də boynum digər vətəndaşlar kimi hüquq qarşısında qıldan incədir. Bizim əziyyətimizi çəkən məmurların hamısına təşəkkürümü bildirirəm”.

A. Abbasov bildirib ki, A. Ağayevin toylara, el şənlikləri və konsertlərə getməsinə hər hansı bir qadağa, məhdudiyyət yoxdur.